വേലിയിറക്കം - മാത്യു നെല്ലിക്കുന്നിന്റെ നോവൽ
രാജൻ എന്ന അമേരിക്കൻ പ്രവാസി മലയാളിയുടെ ദുരന്ത ജീവിതത്തിന്റെ കഥയാണ് വേലിയിറക്കത്തിൽ മാത്യു നെല്ലിക്കുന്ന് അവതരിപ്പിക്കുന്നത്. അമേരിക്കൻ സ്വപ്നങ്ങളുടെ ബലികുടീരമാകുന്ന രാജന്റെ ജീവിതത്തിന്റെ വേലിയേറ്റവും പരാജയവും ഡിട്രോയിറ്റ്, ന്യുയോർക്ക് ജീവിതങ്ങളുടെ പശ്ചാത്തലത്തിൽ വിവരിക്കുന്നു. കഷ്ടപ്പെട്ട് ജീവിതം കെട്ടിപ്പടുക്കുന്ന അയാൾ, തന്നെക്കാൾ സ്വന്തം വളർത്തു നായ്ക്കളെ സ്നേഹിക്കുന്ന മദാമ്മയായ ഭാര്യയുമായി രമ്യതപ്പെട്ടു പോകാൻ കഴിയാതെ, വിവാഹ മോചനം നേടി, വിധവയാകുന്ന മലയാളി സാറാക്കുട്ടിയുമായി ജീവിതം തുടരുന്നു. സാറാക്കുട്ടിയുടെ വ്യഭിചാരം ആ ബന്ധം തകര്ക്കുന്നു. ഡിട്രോയിറ്റിൽ നിന്നും ന്യുയോര്ക്കിലേക്ക് ചേക്കേറുന്ന രാജൻ മദ്യത്തിന്റെയും ചീട്ടുകളിയുടെയും അടിമയായി ജീവിതം തുടരുന്നു. തോൽവി സമ്മതിക്കാതെ നാട്ടിൽ പോയി പഴയ ബന്ധങ്ങൾ മറച്ചു വച്ച് യുവതിയായ ബീനയെ വിവാഹം കഴിച്ചു ന്യുയോർക്കിൽ തിരിച്ചു എത്തുന്നു. ബീനയെ സത്യാവസ്ത മനസ്സിലാക്കി സ്വന്തം സുഹൃത്ത് സ്വന്തമാക്കുന്നു. കള്ള കേസിൽ പ്രതിയാക്കി രാജനെ മാനസിക രോഗിയാക്കി ചിത്രീകരിച്ചു മാനസിക ആശുപത്രിയിൽ ആക്കുന്നു. അവിടെ നിന്നും ഇറങ്ങുന്ന അയാൾ ജീവിത സ്വപ്ന മരീചികയിൽ നിന്നും രക്ഷ പെടുന്നത് ആത്മഹത്യയിലൂടെ ആണ്. ബന്ധങ്ങളും ബന്ധനങ്ങളും ഇല്ലാത്ത ആ ശൂന്യതയിലേക്ക് അയാൾ യാത്രയാകുന്നു.
അമേരിക്കൻ പ്രവാസി ജീവിതത്തിന്റെ വിവിധ മുഖങ്ങൾ നോവലിസ്റ്റ് അവതരിപ്പിക്കുന്നു. മൂല്യങ്ങളുടെയും സംസ്കാരത്തിന്റെയും അന്തരം. അമേരിക്കയിൽ നിന്നും കല്യാണ ആലോചന വരുമ്പോൾ ഒന്നും ആലോചിക്കാതെ സമ്മതം മൂളുന്ന മാതാപിതാക്കൾ. വിവാഹ ചതിക്കുഴിയിൽ വീഴുന്ന പെണ്കുട്ടികൾ. ഇവയെല്ലാം അതിൽ ഉൾപ്പെടുന്നു. പ്രവാസി ജീവിതത്തിന്റെ ദുരന്തങ്ങളുടെ ഘടകങ്ങളും ഇതിൽ സൂചിപ്പിക്കുന്നുണ്ട്. മദ്യം, പണം കൂടുമ്പോൾ ഉള്ള കുത്തഴിഞ്ഞ ജീവിതം, ലൈംഗിക ബന്ധങ്ങൾ, സഹായത്തിനായി എത്തുന്നവരുടെ ചൂഷണം.. ഇങ്ങനെ പലതും. അമേരിക്കൻ പ്രവാസി ജീവിതം ഒരു മരീചിക ആണോ? ആ ചോദ്യം ഇന്നും അവശേഷിക്കുന്നു.
--പൊന്നോലി
No comments:
Post a Comment